Empate da UD Ourense nun encontro no que foron moi superiores ao Atlético Arousana, terceiras clasificadas. Un tanto no 93 privou as pupilas de Rubén García de sumar 3 puntos. Gran imaxe e bo público en Os Remedios para ver fútbol feminino. Nerea e Emma fixeron os tantos das ourensás.

Ó igual que ocorrera na primeira volta en terras arousanas, a xustiza futbolística non fixo acto de presenza fronte o Atlético Arousana. O Ourense foi moi superior a un rival que chegaba na terceira praza e concedendo moi poucos tropezos. As ourensás xogaron con moita coraxe e cun fútbol moi ofensivo que deu o seu resultado en forma de 2 goles,  controlando perfectamente o encontro e dando unha gran imaxe. O tanto no 92 deixou un sabor agridoce nas vermellas.

As pupilas de Rubén García sairon ó campo coa novidade de Feijoo, que regresaba tras lesión. O primeiro achegamento tivoo Loh, pero o colexiado invalidou a xogada por fora de xogo, polo que a zagueira vermella non puido culminar unha xogada encamiñada á portería.

Controlaban o encontro as ourensás, que dominaban o coiro e embotellaban ó seu rival na área. Laura tivo o primeiro cun remate que se estrelaba no pau tras unha boa asistencia de Nerea. Foi a antesala do gol vermello, coas mesmas protagonistas, pero cos papeis cambiados. Desta vez era Laura a que se adentraba na área e habilitaba para Nerea, que dende fóra da área conectaba un forte disparo imparable para a meta rival, .

O gol espoleou as nosas, que tiveron unha nova ocasión nas botas de Zaira, pero o coiro rexeitabao a gardarredes cun auténtico paradón. Cando mellor estaban as nosas e todo parecía encamiñado antes do descanso, chegou o tanto das visitantes, cun golazo lonxe da área, obra de Miriam. Pese ó gol, as nosas voltaron gozar dunha nova oportunidade antes do pitido do colexiado, pero Pacy non acertou a rematar entre os 3 paus.

Tralo paso polos vestiarios, Rubén García moveu ficha e deu entrada a Emma, en detrimento de Zaira. Ao comezo da segunda metade, Noelia exhibíase cun paradón para evitar o segundo das visitantes, que comezaban a chegar algo máis co paso dos minutos.

No 56 chegaba o tanto de Emma, tras unha gran xogada de Celia, que habilitaba á dianteira. Tralo gol, as nosas gozaron dalgunhas oportunidades para ampliar a vantaxe, pero non foron quen de anotar. As visitantes acadarían o empate no 92, co tempo regulamentario xa cumprido arrabuñando así un punto.

Comentar o bo traballo e esforzo das nosas, nunha bochornosa e calorada tarde, que tanto as que saíron dende o inicio coma os trocos de refresco: Emma, Celia, Andrea, Aldara e Noa, deron a cara e mereceron unha vitoria ante un dos millores equipos da categoría.

As nosas conservan a sétima praza con 2 e 3 puntos de vantaxe sobre as súas inmediatas perseguidoras. A vindeira semana visitamos precisamente a unha delas, o Victoria CF «B».

Preme na seguinte ligazón e visualiza a reportaxe fotográfica do encontro